كيف اختار نظارتى

بعد مشوار لدكتور العيون وبعد الكشف على العيون من خلال اختبارات الإشارات المعروف وجملة الدكتور المشهورة "العلامة دي في أي اتجاه"

وفي النهاية عرفتي إنك محتاجة نظارة.

طبعاً بتكوني محتارة في اختيار شكل النظارة.

عاوزاها شيك ولائقة عليكي.

وماتكونش كعب كوباية علي رأي كل الأجداد

ولحسن الحظ إن دلوقتي النظارات متوفرة بألوان مختلفة جديدة وموديلات متنوعة وأشكال كتير مربعة ومستطيلة وبيضاوية وأحجام أكتر تتيح فرصة أكبر لاختيار الشكل واللون المناسب لكل بنت.

وعلشان كده نزلنا ولفينا علي محلات النظارات علشان نقدم لكم شوية نصايح تعرفي بها...

إزاي تختاري النظارة؟!!!!!!

ــ 1 ــ
لون النظارة






علشان تختاري النظارة الصح لازم تاخدي بالك من حاجتين....
أولاً: يكون لونها مناسب للون بشرتك
ثانياً: يكون لونها مناسب لألوان ملابسك

وبصفة عامة بشرتنا بيليق عليها اللون البني بكل درجاته.

ــ 2 ــ
شكل النظارة



لازم كمان تختاري حجم وشكل النظارة المناسب لحجم وشكل الوجه فمثلاً...
لو وشك مدور.... يناسبك كل أشكال النظارات.
لو وشك طويل ورفيع... يناسبك النظارة المسحوبة من الجنبين لأنها بتعطي عرض أكبر للوجه الطويل.
لو وشك طويل ومليان.... يناسبك النظارة المربعة.

ــ 3 ــ
عدسة النظارة




في نوعين من العدسات بلاستيك وزجاج...
العدسة البلاستيك... بتكون أخف وأنقى والـresolution بتاعها عالي.
العدسة الزجاج... فهي أكثر عرضة للتجريح والكسر.

أما إذا كنتِ بتقضي وقت كبير أمام الكمبيوتر أو التليفزيون ممكن تستخدمي عدسات antireflection لأنها بتعكس الأشعة الضارة.




أما بالنسبة لإطار النظارة يفضل اختياره من المعدن لأنه يمكن إصلاحه، أما البلاستيك إذا تعرض للكسر فلا يمكن إصلاحه.

في حالة أن سمك العدسة يكون كبير يفضل استخدام نظارة بإطار كامل وليس بدون إطار أو بنصف إطار لأن ده بيقلل من الشكل الجمالي للنظارة.

ــ 5 ــ
النظارة الشمس




بالنسبة للنظارة الشمس لازم تكون بتغطي العين كلها، وبصفة عامة حجم النظارة الشمس بيكون أكبر نسبياً من النظارة النظر علشان تقدر تحمي العين من الشمس والنظارة المسحوبة من الجنبين غير مناسبة في حالة النظارات الشمس لأنها بتسمح لأشعة الشمس إنها تدخل للعين.


ــ 6 ــ
نظارات آخر موضة




في أثناء اللف والتنطيط على مراكز بيع النظارات سألنا المختصين عن الموضة في عالم النظارات لهذا الصيف وقالوا لنا على شوية حاجات....

بالنسبة لألوان النظارات... الألوان الزاهية موضة جداً الصيف ده وخصوصاً الأحمر والأبيض والأصفر والجديد الصيف ده كمان هو اللون البنفسجي بكل درجاته.

بالنسبة للعدسات... العدسة المستديرة مش موضة؛ ولكن في أشكال تانية كتير ممكن الاختيار منها مستطيلة أو بيضاوية أو مسحوبة من الجنبين أو مربعة.

وكمان الـ strass... كان موضة زمان ورجع تاني الصيف ده سواء لنظارات النظر أو الشمس، وهو عبارة عن نقوش من الكريستال بتكون على ذراعي النظارة وبيدّي شكل جمالي للنظارة.






علشان تحافظي على نظارتك أطول فترة ممكنة هنقول لك على خطوات بسيطة ممكن تعمليها.....

• استخدمي إيديكي الاثنين وإنت بتلبسي النظارة علشان الذراع ما يوسعش.

• في حالة عدم لبس النظارة لازم تحطيها في الجراب الخاص بها.

• اغسلي النظارة باستخدام المياه مرة في اليوم لتنظيفها من الأتربة.

• ما تستخدميش المنديل الورق في تنظيف النظارة لأن ده ممكن يجرح العدسة ويخدشها ويفضل مسحها بمنديل قطن أو جلد غزال.

• تجنبي وضع النظارة علي الجهة التي بها العدسة.