كيفية رسم الاى لاينر على العين

النهارده هاتكلم عن الآي لاينر، لأنه مهم جدا في ماكياج العين لأنه هو اللي بيحدد ويوضح رسمة العين من أولها لآخرها،


وللآي لاينر ألوان كتيرة زي الأزرق والأخضر والبني والموف، وعلى فكرة الألوان دي بتدي شكل حلو أوي للعين لأنها بتبين جمالها..

وللآي لاينر أنواع كثيرة جدا ففي..

الآي لاينر القلم
والنوع ده جاف وعلشان كده ممكن تستعمليه بسهولة وكمان بيثبت لفترة طويلة بس هو غالي شوية.

الآي لاينر السائل
وده بيتحط بالفرشة بس لازم تكوني محترفة وإيديكي ثابتة أوي علشان تعرفي تظبطيه.

وفيه كمان أشكال مختلفة لفرش الآي لاينر زي..

الفرشة الرقيقة
ودي ممكن ثنيها وهي أحسن نوع لفرش الآي لاينر.

المكحلة
بس النوع ده مع الحر بيسيح على الوش ويعمل نقط زي المية، وممكن يبوظ المكياج.

إزاي ترسمي عينيكي بالآي لاينر؟!
علشان تقدري إنك تقدري ترسمي عينيكي بالآي لاينر من غير ما تبذلي مجهود كبير، يبقى لازم تكون إيدك ثابتة وأنت بترسمي الآي لاينر، ولو مش قادرة تتحكمي في ثبات إيدك يبقى ممكن إنك تسندي إيدك على خدك، بعد كده ترسمي خط فوق العين، وتبدئي من زاوية العين الداخلية، وتخرجي على بره، وتركزي الفرشاة على الرموش العلوية، وتخرجي بالفرشاة للخارج قليلاً....

ولو عايزة الآي لاينر يكون شكله هادي وطبيعي يبقى تخففي خط الآي لاينر بآي شادو أسود أو كحل غامق؛ لكن لو عايزة عينيكي يكون شكلها جريء يبقى ممكن تسيبي خط الآي لاينر بارز.

وبلاش موضوع إنك تحددي عينيكي من تحت بالآي لاينر؛ لإنه بيكون شكله صارخ جدا، ومش مناسب نهائي لماكياج النهارده؛ غير إنك مش هتعرفي تظبطيه بالشكل الصح.

وفي النهاية أحب أقول لك إنك ممكن ترسمي عينيكي رسمة "القطة" بأنك تحددي عينيكي بالآي لاينر من قدام

أما رسمة "الفراعنة" فدي هتحصلي عليها بإنك ترسمي الآي لاينر من عند الزاوية الخارجية للعين.