اعرفي نوع شعرك.. واعرفى ازاى تعتنى به

تحديد نوع الشعر حاجة مهمة جداً علشان نقدر نتعامل معاه..
وعلشان كتير منكم بيسأل عن أنواع الشعر المختلفة "الدهني والجاف والعادي"...
إزاي نقدر نتعامل مع كل نوع؟..
وإيه نوع الشامبو المناسب؟..
والمشاكل المرتبطة بكل نوع وإزاي نحلها؟...
النهارده هانتكلم عن الشعر الدهني والجاف وإحنا بنجاوب على أسئلتكم...

الشعر الدهني
إزاى أقدر أتعامل مع شعري الدهني؟
من أهم مشاكل الشعر الدهني هي أن الشعر بيكون مزيت جداً وحتى لو اتغسل الشعر مرتين في اليوم بيكون شكله دهني.
وعلشان نتغلّب على المشكلة دي لازم تستخدمي شامبو فقط ويكون خالي من الصوديوم... وفي نفس الوقت ممنوع استخدام البلسم أو الكريم.. والسيطرة على الشعر الدهني بتاخد وقت وبعد كده الشعر بيتغيّر من دهني لعادي لأن الشعر متقلب.

الشعر الجاف

إزاي أتعامل مع الشعر الجاف؟
الشعر الجاف هو الشعر القاسي ولازم نعمل له حمامات كريم بصفه دورية كل أسبوع علشان الشعر نفسه يتحسّن ويتحول من شعر جاف لشعر عادي.
هل الشعر الجاف طبيعة شعر أم سوء استخدام للشعر؟
طبعاً كل شعر بيكون له طبيعة خلقها ربنا عليه، لكن الفكرة كلها في أننا بنحاول نلاقي أنسب الحلول علشان نحسّن شعرنا، ودلوقت مع التطور اللي بنعيشه كل يوم أصبح علاج الشعر الجاف مشكلة بسيطة وعلاجه بسيط ويتركز في عمل حمامات كريم للشعر الجاف وعمل الكيراتين.

هل مع الوقت ممكن يتغيّر نوع الشعر بالرعاية والعناية؟
طبعاً في حالة المواظبة على استخدام الشامبو المعالج، ولكن لازم نصبر؛ لأن في البداية الشعر بينشف لأنه مش بيكون متعوّد عليه لمدة أسبوعين أو ثلاثة، ولكن بعد ذلك الشعر بيتعود عليه وبيخليه طري وناعم جداً.
تأثير الأكل على الشعر
إيه التغييرات اللي بتحصل للشعر.. وهل للأكل علاقة بشكل وطبيعة الشعر؟
صحيح الشعر بيتأثر بالمشاكل النفسية والصحية اللي ممكن نتعرّض لها مثلاً الشعر بيتأثر بالسلب أثناء تغيير الهرمونات أو أي مشكلة صحية أو سوء تغذية وكمان من الوجبات السريعة.

ومن الحاجات اللي بتنعكس على الشعر بالسلب هي الهرمونات الموجودة في أكلنا زي الفراخ والفاكهة والخضار... والمنتجات الحيوية مع الأسف سعرها مرتفع جداً جداً.
الأكل الصحي أو كما نسمّيه الحيوي مفيد جداً للشعر يُعطيه شكل صحي ويحميه من التقصف وحتى لو فتلة الشعر ضعيفة يبقى الشعر شكله طبيعي بدون تقصف وبدون أي مشاكل.